Ukraynanın həbsxanadakı keçmiş Baş naziri, "Narıncı Şahzadə” ləqəbli Yuliya Timoşenkonun qızı Yevgeniya Timoşenko anasının səhhətinin sürətlə pisləşdiyini və keçirdiyi aclıq aksiyasının ona pis təsir etdiyini deyib.

Yevgeniya Timoşenko anasının 7 gündür heç bir şey yemədiyini, yalnız su içdiyini deyib. O həmçinin anasının sabahkı məhkəmədə çətinlik çəkəcəyini deyib.

Bu arada isə bəlli olub ki, həbsxana mühafizəçiləri Yuliya Timoşenkonu döyüblər. Timoşenkonun döyüldüyünü əks etdirən fotolar mətbuatda öz əksini tapıb.

Avropa Futbol Çempionatı boykot edilə bilər

Almaniyanın Daxili İşlər naziri Hans-Peter Fridrix bir çox Avropalı liderin Yulya Timoşenkoya qarşı edilənlərə görə, bu ölkədə təşkil ediləcək Avropa Futbol Çempionatını boykot edə biləcəyini bildirib.

İdman məsələlərindən də cavabdeh olan Fridrix bildirib ki, Avropanın ortasında Timoşenkoya mədəni bir ölkənin qaydaları çərçivəsində rəftar edilməyib və buna görə də futbol stadionunda sevinc nümayiş etdirməyi düşünmür.

Fridrix futbol matçlarını izləmək üçün Ukraynaya getməyi planlaşdıran bir çox siyasətçinin bundan imtina etməsinin mümkün olduğunu da ifadə edib.

Ukraynanın müxalifət lideri, narıncı inqilabın liderlərindən biri və sabiq Baş nazir Yuliya Timoşenko vəzifəsindən sui-istifadə etmək ittihamlarıyla 2011-ci ilin iyul ayında 7 il həbs cəzasına məhkum edilmişdi. Qərb siyasətçilərinin çoxu Timoşenkoya verilən cəzanın siyasi məqsədlərdən irəli gəldiyini bildirirlər.