Azərbaycan Dövlət Şəhərsalma və Arxitektura Komitəsində şəhərsalma sahəsində yol verilən nöqsanların aradan qaldırılması və ötən il görülmüş işlərlə bağlı kollegiya iclası keçirilib.

İclasda Komitənin sədri Abbas Ələsgərov ölkənin bir sıra şəhər və rayonlarında əhalinin vəsaiti hesabına tikilən obyektlərin şəhərsalma nöqteyi-nəzərindən sənədləşdirilməsində xeyli nöqsanlara yol verildiyini nəzərə çatdırıb və bildirib ki, bu sahədə Komitə tərəfindən nöqsanların aradan qaldırılması istiqamətində görülən işlərlə kifayətlənmək olmaz. Bu istiqamətdə daha ciddi addımlar atılmalı, hər bir işçinin məsuliyyəti yüksəldilməli, cavabdeh olduğu ərazilər və məsələlər konkretləşdirilməlidir.

Sonra Komitənin nəzarət şöbəsinin müdiri Dilxoş Nuriyev «Dövlət şəhərsalma-memarlıq nəzarətinin həyata keçirilməsi Qaydaları»nın tələblərinə uyğun olaraq qurumun əməkdaşları tərəfindən 2011-ci ildə aparılan nəzarət tədbirləri nəticəsində aşkarlanmış, şəhərsalma sənədləri ilə əsaslandırılmadan, həmçinin şəhərsalma norma və qaydalarının tələblərini pozmaqla yerləşdirilən obyektlər barədə məruzə edib.

Bununla yanaşı, prezident İlham Əliyev tərəfindən 2011-ci ildə imzalanmış fərman və sərəncamların Dövlət Şəhərsalma və Arxitektura Komitəsində icrası ilə bağlı görülmüş işlər barədə Komitə aparatının rəhbəri Elmar Hüseynzadənin məlumatı dinlənilib.

Müzakirə olunan məsələlər barədə müvafiq qərarlar qəbul edilib.