Ötən ay istehlak malları fevral ayı ilə müqayisədə 0,5% bahalanıb. Mart ayında ərzaq məhsulları 1,1% bahalanıb, qeyri-ərzaq məhsulları isə 0,3% ucuzlaşıb, xidmət tarifləri isə 0,1% artıb. Bu barədə qəzetimizə İqtisadi Tədqiqatlar Mərkəzindən (İTM) məlumat verilib.



İTM ekspertləri tərəfindən aparılan müşahidələrə görə, fevral ayına nisbətdə mart ayı ərzində paytaxt Bakıda qiymətlər 0,7%, regionlarda isə 0,4% artıb. O cümlədən ərzaq məhsulları Bakıda 1,5%, regionlarda 0,6% bahalanıb, qeyri-ərzaq məhsulları Bakıda 0,6% ucuzlaşıb, regionlarda isə 0,07% bahalanıb. Xidmətlərin dəyəri Bakıda 0,04% azalıb, regionlarda isə 0,3% artıb. Ay ərzində ən çox mövsümi amillərlə bağlı göyərti (20,2%) və baş soğan (6,7%) ucuzlaşıb. Bahalaşma isə toyuq (5,7%), nar (11,6%), qatıq (1,8%) və digər məhsullarda qeydə alınıb.

Hesablamalar göstərib ki, 2012-ci ilin birinci rübündə ölkədə 1,1%, o cümlədən Bakıda 1,5%, regionlarda isə 0,7% inflyasiya qeydə alınıb. Bu zaman ərzaq məhsulları 2,3%, xidmətlər 0,9% bahalaşıb, qeyri-ərzaq məhsulları isə 1,3% ucuzlaşıb. Ötən ilin eyni dövrü ilə müqayisədə (12 ayda) ölkədə 7,2% bahalaşma qeydə alınıb. Bu zaman Bakıda qiymətlər 10,2%, regionlarda isə 4,3% artıb. Qeyd olunan dövrdə ən yüksək inflyasiya yenə ərzaq məhsullarında (11,4%) olub. Qeyri-ərzaq məhsullarında artım 0,7%, xidmətlərdə isə 5% təşkil edib.



Ərzaq üçün ayda minimum 107,03 manat xərcləmişik”

İTM ekspertləri eyni zamanda 10 regionda qeydə alınan qiymətlər və Nazirlər Kabinetinin 30 aprel 2009-cu il tarixli qərarı ilə təsdiq olunan normativlər əsasında mart ayı üzrə minimum istehlak səbətinin dəyərini də hesablayıblar. Həmin hesablamalara əsasən, ay ərzində Azərbaycanda əməkqabiliyyətli əhali üçün adambaşına minimum istehlak səbətinin dəyəri 170,7 manat, pensiyaçılar üçün 154,1 manat, 0-14 yaşlı uşaqlar üçünsə 212,4 manat təşkil edib. Ötən ay əməkqabiliyyətli əhali adambaşına ərzağa minimum 107,03 manat, pensiyaçılar 96,4 manat, 0-14 yaşlı uşaqların valideynləri isə 121,5 manat xərcləməli olub. Ay ərzində bazardakı qiymətlərlə əhalinin qeyri-ərzaq məhsullarına çəkdiyi minimum xərcləri işləyən əhali üçün 38,2 manat, pensiyaçılar üçün 35,03 manat, 0-14 yaşlı uşaqlar üçün 73,1 manat, xidmət xərcləri isə müvafiq olaraq, 25,5 manat, 22,6 manat və 17,7 manat təşkil edib.

Xatırladaq ki, "Azərbaycan Respublikasında 2012-ci il üçün yaşayış minimumu haqqında” qanun əsasında ölkədə 2012-ci il üçün yaşayış minimumu 108 manat, əməkqabiliyyətli əhali üçün 116 manat, pensiyaçılar üçün 84 manat, uşaqlar üçün 87 manat məbləğində müəyyən edilib”.