"Barselona” futbol klubunun baş məşqçisi Xosep Qvardiola ispan klubunu tərk etdikdən sonra Londonun "Çelsi” klubuna başçılıq edəcəyi barədə məlumatları təkzib edib.Qvardiola bu bəyanatı idman mətbuatında onun London klubu ilə müqavilə bağlayacağı barədə informasiya yayılmasından sonra verib.

Məşqçi "Çelsi”yə keçəcəyi barədə şayiələri şərh edərkən bildirib ki, London klubuna başçılıq etməyi doğru saymır: "İngilis klubu ilə müqavilə bağlamağım Çempionlar Liqasında "Çelsi”yə uduzaraq mübarizəni dayandıran "Barselona”ya qarşı hörmətsizlik olardı”.

Qvardiola onu da bildirib ki, komandanı tərk edəcəyi ilə bağlı rəhbərliyə hələ 2011-ci ilin oktyabrında xəbərdarlıq edib. O, "Barselona” ilə vidalaşandan sonra nə edəcəyini hələ dəqiqləşdirmədiyini, amma məşqçilik fəaliyyətindən bir qədər aralanmaq istədiyini vurğulayıb.