Tanınmış gənc estrada ulduzu Günel Ələkbərova son vaxtlar mətbuatda onun adını hallandıran bəzi həmkarları haqqında açıqlama verib. Hələlik ad çəkməyən müğənni, ilk mesajını üstüörtülü ötürsə də fikirləri çox maraqlıdır: "Kimsə adımdan istifadə etməsin! Bəli, bu tərəfimdən ünvanlanan ultimatumdur. İşi-gücü adımı çəkməkdən ibarət olan, hətta şəkillərimlə özünü reklam edən bir kişi müğənni var. Populyar olmağın yolunu ancaq mənim kölgəmdə görən o sənətçiyə demək istəyirəm, artıq yetər. Axı, nə vaxta qədər olacaq? Heç kimin özəl həyatına müdaxilə etmədiyim halda, kimlərsə gecəni-gündüzə qatıb hər yerdə Günel Ələkbərova deyirlər. Əgər mənim də məqsədim piara yönəlik olsaydı, susmazdım, ad çəkərdim. Bu, mənə yad olan bir şeydir. Çünki bütün qüvvəmi yalnız yaradıcılığa həsr etməkdəyəm. Qoy bəziləri elə məhz məndən örnək götürsünlər. Axı, nə vaxta qədər adımdan reklam vasitəsi kimi yararlanıb, danışacaqlar? Ondansa yeni mahnılar yazdırıb gündəmə gəlsinlər. Kiminsə kimləsə münasibəti varsa, qoy internetə öz şəkillərini vursunlar. Daha mənim fotolarımla niyə reklam olunmaq istəyirlər ki? Allah xoşbəxt eləsin deyirəm. Şükr olsun ki, şəxsi həyatımda hər şey normaldır, məni sevən insanların əhatəsindəyəm. Və ən başlıcası, söz-söhbətlərdən uzağam. Amma bilsinlər, bu sözlərimdən nəticə çıxarmasalar, şok açıqlamalara hazır dayansınlar. Əgər mən bildiklərimin 10 faizini danışaramsa, çoxları bu şou-biznesdən başlarını aşağı salıb gedərlər. Susmuşam, susuram, amma ola bilsin ki, bunun ardı gəlsə, çox pis danışdım”- Ələkbərova fikirlərini belə tamamladı. Qeyd edək ki, "Qala qrupu”nun solistlərindən biri olan Ceyhun Əliyev saytlarda özünü Günelin eks-sevgilisi kimi təqdim edir. Amma iki-üç gün öncə yazılan məlumata görə, Ceyhunla müğənni Günay İbrahimli arasında sevgi cücərtiləri formalaşır. Onu da bildirək ki, Günel və Ceyhun arasında sırf dost münasibətləri olub.
|