Azərbaycan gömrükçülərinin həyata keçirdiyi tədbirlər nəticəsində ölkəyə qaçaqmalçılıq yolu ilə mobil telefonların gətirilməsinin qarşısı alınıb. Bu barədə Dövlət Gömrük Komitəsindən məlumat verilib.
Dubay-Bakı aviareysinin sərnişini Azərbaycan vətəndaşı Bəhruz Məmmədov Heydər Əliyev Beynəlxalq Aeroportunun «Şimal» terminalının gəliş zalında sərhəd nəzarətindən əvvəl yerləşən sanitariya qovşağına daxil olaraq, orada keçmiş iş yoldaşı Rəşad Ağayevə sellofan paketə qablaşdırılmış 5 ədəd «Iphone 4S 16G» markalı mobil telefon verib. Sərhəd nəzarətini keçdikdən sonra isə B.Məmmədov öz üzərində 2 ədəd «BlackBerry Porche Design Smartphone P9981» markalı mobil telefonu qutusuz şəkildə gömrük nəzarətindən bəyan etməməklə keçirərək, qarşılama zalında olan dostuna verib. Gömrük nəzarətindən keçərkən gömrük əməkdaşı tərəfindən saxlanılmış R.Ağayevdə bəyan olunmayan 5 ədəd «Iphone 4S 16G» markalı mobil telefon (aksesuarları ilə birlikdə) aşkar olunaraq, protokol əsasında götürülüb. Öz növbəsində, B.Məmmədov gömrük nəzarətindən keçərkən onun baqajlarından bəyan olunmayan 2 ədəd «BlackBerry Porche Design Smartphone P9981» markalı mobil telefonun boş qutuları, onların aksesuarları və bəyan olunmayan 1 ədəd «Iphone 4S 32G» markalı mobil telefon (aksesuarları ilə birlikdə) aşkar olunaraq, protokol əsasında götürülüb. Keçirilmiş tədbirlər nəticəsində qutularda olmayan 2 ədəd «BlackBerry Porche Design Smartphone P9981» markalı mobil telefon aeroportun ərazisindəki avtodayanacaqda – «Mercedes» markalı avtomaşında olan şəxsdə aşkarlanıb. Araşdırma zamanı müəyyən edilib ki, B.Məmmədovun Dubay-Bakı aviareysi ilə gətirdiyi telefonların gömrük sərhədindən qanunsuz keçirilməsində Azərbaycan vətəndaşları Rafiq İbrahimov və Rəşad Ağayev iştirak ediblər.
Gömrükçülərin həyata keçirdikləri digər tədbirlər zamanı yük sənədlərində İrandan bentonit gətirdiyi göstərilən Azərbaycan vətəndaşı Əliağa Musayevin idarə etdiyi «MAZ 54323» markalı yük maşınına baxış zamanı qoşquda sənədlərdə göstərilməmiş 3 adda məhsul - 80 karton qutu «Dərya», 370 karton qutu «ABC» adlı yuyucu tozlar və 2830 karton qutu «Amir Dates» adlı xurma məmulatı aşkarlanıb. Bütün faktlarla bağlı təhqiqat aparılır.
|