XeberdarOlaq.Fo.ru xəbər verir ki, XeberdarOlaq.Ucoz.Com saytının daimi oxucusu Sahib Əliyevin saytın redaksiyasına göndərdiyi məktubda bu məsələyə toxunulub. 

"171 saylı marşrut avtobusu metronun "Qara Qarayev" stansiyasından Bilgəh qəsəbəsinə gedir. Bu avtobus Zuğulba qəsəbəsindən də keçir. Maşrutun uzunluğu 30 kilometrdir. Tarif Şurasının qərarına əsasən, məsafədən asılı olaraq, hər kilometrin qiyməti 1 qəpikdir. Bu qəsəbələr arasında gediş haqqı isə 20 qəpik müəyyən olunub. Əvvəllər qiymətlər belə idi və avtobusların salonlarından da tariflər qeyd olunmuşdu. Lakin indi həmin qiymətləri çıxarıblar, əvəzində öz qiymətlərini yerləşdiriblər. Məsafədən asılı olmayaraq Zuğulbaya qədər gediş haqqı - 40 qəpik, qəsəbələr arası gediş haqqı - 30 qəpik. Bundan başqa, sürücülər gediş haqqı kimi 40 qəpik ödəməyən sərnişinləri təhqir edirlər", - oxucunun məktubunda qeyd olunub.

Məsələyə aydınlıq gətirmək üçün saytın əməkdaşı İqtisadi İnkişaf Nazirliyinin ictimaiyyətlə əlaqələr şöbəsinin müdiri Abbas Əliyevlə əlaqə saxlayb.

"Əgər sürücülər sərnişinlərdən Tarif Şurasının təyin etdiyi qiymətlərdən artıq pul tələb edirlərsə, bu, qanuna ziddir. Belə bir problemlə üzləşən sərnişinlər İqtisadi İnkişaf Nazirliyinin nəzdində istehlakçı hüquqlarının müdafiəsi və antiinhisar xidmətinə - (012) 498-15-01 və (012) 498-15-04 nömrələrinə zəng vurub məlumat verə bilərlər. Bundan başqa, İqtisadi İnkişaf Nazirliyinin qaynar xəttinə - 195 nömrəsinə zəng vura da bilərlər. Biz vətəndaşların bütün müraciətlərini araşdırmağa hazırıq", - Abbas Əliyev qeyd edib.

Məsələyə münasibət bildirməsi üçün Nəqliyyat Nazirliyinin ictimaiyyətlə əlaqələr şöbəsinin müdiri Namiq Abbasovla əlaqə saxlamaq isə mümkün olmayıb.