Milli Məclisin Hüquq siyasəti və dövlət quruculuğu komitəsinin üzvü Rəfail Cəbrayılov XeberdarOlaq.Fo.Ru-ə bildirib ki, parlamentin builki payız sessiyasında sərxoş sürücülərə qarşı qanunvericiliklə nəzərdə tutulan məsuliyyətin sərtləşdirilməsi müzakirə olunacaq.

"Azərbaycanda avtomobili sərxoş halda idarə edənlər yalnız inzibati qaydada cəzalandırılır. Həmin sərxoş sürücü gərək kiməsə xəsarət yetirsin ki, cinayət məsuliyyətinə cəlb olunsun", - Cəbrayılov deyib.

Deputat hesab edir ki, avtomobili sərxoş halda idarə edənlər birmənalı olaraq sürücülük vəsiqəsindən məhrum edilməlidirlər.

O, bu məsələ ilə bağlı Ukrayna təcrübəsinin də maraqlı olduğunu vurğulayıb.

"Ukraynada bir şəxs sistematik şəkildə avtomobili sərxoş idarə edirsə, onun avtomobili müsadirə olunur", - Cəbrayılov qeyd edib.

Bu ilin I yarısında Azərbaycanda 449 986 yol hərəkəti qaydalarının pozuntusu qeydə alınıb ki, onlardan 9116-sı nəqliyyat vasitələrinin sərxoş sürücülər tərəfindən idarə edilməsi nəticəsində baş verib.