![»](http://xeberdarolaq.ucoz.com/yol_qezasi.jpg)
XeberdarOlaq.Ucoz.Com Kanal S-ə istinadən xəbər verir ki, bu gün 09:30 radələrində Qarməryəm-İsmayıllı-Şəki magistral yolunun 138-ci kilometrliyində qəza olub. Hadisə zamanı əslən balakənli olan Bakı şəhər sakini Cücüyev Məhəmməd Rəcəb oğlunun idarə etdiyi 90 LS 007 dövlət nömrə nişanlı "Toyota" markalı avtomobil, Oğuz rayon Ərmənət kənd sakini Əfəndiyev Qəhrəman Şəfi oğlunun idarə etdiyi 48 BA 481 dövlət nömrə nişanlı "VAZ-21011" markalı avtomobil eyni istiqamətdə hərəkətdə olarkən toqquşub.
Qəza nəticəsində "VAZ-21011" zərbə gücündən yol kənarındakı ağacı da aşıraraq yuvarlanıb. Hadisə zamanı "VAZ-21011"in sürücüsü ilə yanaşı, avtomobildə olan 2 nəfər sərnişin müxtəlif dərəcəli bədən xəsarətləri alıb, 1 nəfər isə elə hadisə yerindəcə dünyasını dəyişib.
Xəsarət alanlar dərhal Şəki Mərkəzi Rayon Xəstəxanasına yerləşdiriliblər. "VAZ" markalı avtomobildə olan qadın hamilə olub və onun vəziyyəti heç də qənaətbəxş sayılmır. Qəza zamanı digər avtomobildə olanlar isə heç bir xəsarət almayıblar.
"Toyota" markalı avtomobilin sürücüsünün bildirdiklərinə əsasən, o, ötmə əməliyyatını yerinə yetirərkən "VAZ" markalı avtomobil qəfildən onun qarşısına çıxıb və nəticədə o arxadan çırpılıb. Qəzanın ilkin olaraq ötmə əməliyyatının düzgün yerinə yetirilməməsi və yüksək sürət olması səbəbindən baş verdiyi ehtimal olunur.
Faktla bağlı Baş Dövlət Yol Polisi İdarəsinin istintaq bölməsi tərəfindən araşdırmalar aparılır. Onu da qeyd edək ki, bu, 2 həftə ərzində həmin ərazidə baş verən sayca 3-cü yol qəza hadisəsidir.
|