Cənub TV-yə istinadən xəbər verir ki, Lənkəranda Dini Qurumlarla İş üzrə Dövlət Komitəsi, İslam Konfransı Gənclər Forumunun Avrasiya Regional Mərkəzi ilə birlikdə keçirdiyi "Dövlət-din münasibətləri və maarifləndirmə işi” mövzusunda regional konfransa
yekun vurulub. Konfransda birgə fəaliyyət planı qəbul edilib. Sənəddə ölkədə prezident İlham Əliyevin rəhbərliyi ilə aparılan dövlət-din sahəsindəki siyasət dəstəklənib, milli-mənəvi dəyərlərin qorunması istiqamətində görülən işlər yüksək qiymətləndirilib.

Tədbirin yekun günü "İslam və sağlam ailə” mövzusunda keçirilən plenar iclasda "Gənc qadınların ictimai fəallığının artırılmasında dini icmaların rolu” layihəsi təqdim edildi. "İslamda ailə modeli və müasir cəmiyyət” mövzusunda çıxış edilərək ailənin əhəmiyyətindən danışılıb. Bildirilib ki, islam əxlaqında ailəyə böyük önəm verilir. "Bu məsələ öndə gedən və peyğəmbərimizin vurğuladığı vacib məsələrdən biridir.”

QMİ sədrinin səlahiyyətli nümayəndəsi Qəni Axundzadə "Din xadimləri İslamda orta yolun təbliğatçısı və təşviqatçısı kimi” mövzusunda çıxış edərək bu istiqamətdə aparılan işləri seminar iştirakçılarının nəzərinə çatdırıb.

"Cənub bölgəsində ənənəvi dindarlıq və İslamda orta yol” mövzusunda məruzədə qeyd olunub ki, Azərbaycanda, xüsusən də cənub bölgəsində ənənəvi dindarlıq əsrlərdir mövcuddur və İslamda orta yol qorunub saxlanılır. Həmçinin Azərbaycanda ənənəvi olaraq müxtəlif din və məzhəblərin ardıcıllarının əmin-amanlıq şəraitində yaşadıqları vurğulanıb, bu tarixi dəyərin qorunmasının vacibliyi diqqətə çatdırılıb.

Plenar iclasın sonunda Azərbaycanın Milli Qəhrəmanı Mübariz İbrahimova həsr edilən sənədli film nümayiş etdirildi. Regional konfransın sonunda iştirakçılar bölgə üçün birgə fəaliyyət planını qəbul ediblər. Sənəddə ölkədə prezident İlham Əliyevin rəhbərliyi ilə aparılan dövlət-din sahəsindəki siyasət dəstəklənib, milli-mənəvi dəyərlərin qorunması istiqamətində görülən işlər yüksək qiymətləndirilib. Maarifləndirmə işinin davamlı və intensiv keçirilməsi, icmaların bölgələrdə sosial-mədəni inkişaf prosesində daha müasir formada iştiraklarının zəruriliyi vurğulanıb.